WGH Phulbari jolo bijoli watjani a·sel skul bi·sarangni porikka ong·engon neng·nikaniko man·enganina jolni NGO dol jekai GSU, AHAM aro NGCO apsan bakrime Phulbari FEDCO office-ona re·ange re·baenggipa sombar saloni office-ko chipatna ka·mikkenataniko dakangaha.
Phulbari GSU Secretary Pangsrang Sangma-ni agananigitade re·anggipa May japaksaoni da·ona kingking bijoli watani tik ong·jagenchimoba FEDCO office-nigita maming nirok simsakani dongjani a·sel songni manderangna neng·nikaniko man·enganina Sombar salna skang bijoliko tik ong·e sokatna man·jagenchim ong·ode Sombar saloni office kulijachina ba office-ko chipatnagita aganangaha.
Garo Hills-ni gipin bakrango mikka balwarang ong·genchimoba bijolirang tik ong·e watnagita man·ode Phulbari jolo maini asel bijoliko antisana batpile galchipe nirokgija don·enga aro bilsi antian bijolini gimin pangnan jadokni porikkako seani somoiosa chagrongbata ine GSU Secretay sing·doangaha. Indake ong·engani gisepon daito donggipa officer-rangko ta·rake nirokatchina didiatan baksana sombar salna skang bijoliko sokatjaode office kulina on·jawa ine mikrakatniko dakangaha.
