Re·anggipa salrango, South Garo Hills Chokpot Sub-Divisional Officer ni kamko jako ra·e kam ka·enggipa MCS Pittingson R. Sangma aro Block Development Officer MCS Jericko N. Marak ko gipin biapchina apjitataniko Chokpot jolni GSU dolrang jegalataha. Pittingson R. Sangma Chokpot jolni manderangna ja sasan dangdike on·kuengachim aro uni kam ka·anio somoirang chu·ongkuja baksana ua kamtangko ka·sae, aro gisik nangbee ka·gipa ong·ani gimin uko gipin biapchi watatna nangnikgijaniko GSU parakataha. Uni kam ka·anichi Chokpot jolni manderang gamchatgipa ong·gen ine GSU dol janapataha.
Apsandake, Jericko N Sangma jean ua jolko namdapatna kam ka·enggiparangko nikrokengachim, ua gipin biapchi re·anggen ong·ode songsalna namen gimaani ong·a ine GSU janapataha. Ia namgipa officer rang Chokpot o dongkue kam ka·anichi songdonggipa manderangna gamchatgipa ong·gen ine daito donggipa dilgiparangko uamang sakgniko gipin biapchina watatna tik ka·aniko ra·galpilchina gita GSU Chokpot Regional unit mol·molata. Unbaksa ia neng·nikaniko chel·atna man·jagenchimode gipin cholchi dakna draataona soknaba donga ine mikrakatniko on·angaha.
