Chang 18 gipa Mumbai International Film Festival (MIFF) o Elvachisa Ch. Sangma aro Dipankar Das-ni tarigipa ”Chanchisoa” jawilwat award-ko man·angaha. Ia jawilwatko tarinagita Dr. Bhupen Hazarika Regional Government Film & Television Institute dakchakaha jean da·o a·songni gadango Best Student Film award-ko man·e chu·sokangaha.
”Chanchisoa” minute 29-ni jawilwat ong·a jekon North East a·dokni Garo Hills-ni nokdango tangka paisanigita neng·nikaniko chagronganio pangchake tariaha. Ia jawilwato ma·gipani neng·sikimani, pagipani mikkangchake kamrangko jotton ka·ani, dedrangrangni nama gadango poraina miksonganiko aro jikgipani nokdangoni matnanganirangko man·e janggi tanganiko mesokaha.
Tura songjinmani Elvachisa Ch Sangma ni ian skanggipa director ong·e jawilwat tarichenggipa ong·a. Ia jawilwato bak donggipa manderangara Cinemetographer-na Ramjyoti Krishnacharan, Ajijul Islam, Elvachisa Ch Sangma, Sound ba gam·anio Abhijit aro Bulidingstone, Editor-na Dipankar Das, Saptarshi Rajkumar, Damebanri, Priyanuj aro Doyel, iamang kamko ka·angskaaha.
Ia festival-o Ge 77 jawilwatrang aro Cannes La Cinef award winner baksa susagrikanio ”Chanchisoa” jawilwat golpo agananio aro noksarangko ra·anio nambatgipani bimungko man·aha. Sankar Desai Film Director & Joint Secretary IDFA-ni President, MIB, Prithul Kumar Sudhir Mungantiwar, Maharashtra-ni Cultural Affairs Minister Actor Shekhar Suman-ni jakchi award baksana trophy aro tangka gong lakh 1 koba on·angaha.
