Chokpot ni dingtang dingtang NGO dolrang jekai GSU Chokpot Regional Unit, FKJGP Chokpot, AWYO Chokpot, AHAM Chokpot, CAVC aro GSMC Chokpot apsan meli-ku·monge Chokpot o mijal salni bako tom·aniko ong·atangaha.
South Garo Hills Chokpot Sub-Divisional Officer ni kamko jako ra·e kam ka·enggipa MCS Pittingson R. Sangma aro Block Development Officer MCS Jericko N. Marak ko gipin biapchina apjitatanina Chokpot jolni NGO rang uamangni namnikgijaniko mesokna tom·aniko dakangaha. Ia sakgni officer rang Chokpot jolni manderangna jasana mangmangsan kam ko ka·e dangdike on·ani ja·manan gipin biapona apjitataniko man·aha.
Uamang songsal na name dangdike on·ani gimin Chokpot ni NGO rang ku·mong nangrime a·dok sorkariko ia sakgni officer-rangko gipin biapona transfer ka·ataniko dontongatchina mol·molaniko dakangaha. Sorkari uamangni dabianiko knachakjagenchimode mikkangchi raka ja·ku ko de·angskagen ine gimik NGO ni palo aganchakenggengipa Deku Sub-Unit GSMC ni General Secretary Nahinsing T. Sangma aganangaha.
