Selsella-o songdongenggipa manderangni palo jolni NGO jekai A·chik Students’ Welfare Association (ASWA), Federation for Khasi Jaintia Garo People (FKJGP), Garo Students’ Union (GSU) aro Association for Democratic Empowerment (ADE) dolrang apsan bakrime Selsella-o ATM-ko songe on·china aro Selsella-Balachanda ramako ta·rake tarie on·china CM Conrad K. Sangma chitti see u·iatangaha.
Uamangni janapatanigitade, Selsella-o ATM donggenchimoba da·onaba uko jakkalna man·kujaengani a·selo jolo songdongenggipa manderang an·tangtangni tangka paisarangko bikotna namen neng·nikaniko man·enga ine janapataha. Iani gisepon SBI Branch Manager-na battanggimin 2021 oni changnichang u·iataniko on·genchimoba da·onaba maming ja·kuko de·kujaenga ine matnange aganangaha. Indake ong·engon jolo songdongenggipa manderangni neng·nikaniko naljokatnagita nanggipa ja·kurangko de·e nirokatchina NGO dolrang CM-na janapataha.
Apsandaken Selsella-Balachanda rama namen namjabegipa ong·ani gisepon Public Works Department (PWD) na u·iataniko dakahaoba da·ona kingkingba ia ramako nirokatani dongkujaenga ineba NGO dolrang u·iatangaha. Indake ong·enggon ia rama namjani a·sel Selsella, Balachanda aro Rajabala-ona songregipa manderang re·ruraanio namen neng·nikaniko man·an baksana a·sel obostako chagrongna kenbegnigipa rama ong·engga ineba uamang janapangaha.
Indake ia pilak neng·nikanirangko nirokate nanga ja·kurangko de·e kamrangko ta·rake ka·china CM Sangma-ko didiangan baksa ia janapatgiminrangko sal 21 ni gisepo tarie on·jagenchimode uamang chotchanggija dabianiko dakna tik ka·angaha.
