National Testing Agency (NTA) NEET-UG porikkako changsatai seatpiltaianio, a·dokni chatro chatrirang 50 percent-nigitasan porikka seanio bakko ra·angtokaha. Re·anggipa May 5 tariko NEET-UG porikkako seanio somoirang man·srapjani a·selo sak 1,563 chatro chatrirangna NTA NEET-UG porikkako dam 6 centre jean Meghalaya, Chandigarh, Chattisgarh, Gujarat aro Haryana a·dokrango porikkako seatpiltaina cholko on·angaha. Ia porikkako setaipilanio sak 813 chatro chatrirang dam 6 centre-rango seangaha.
Meghalaya a·doko ia porikkako seatpilaniko Tura-o ong·atanganio sak 464 chatro chatrirang porikkako sena seokako man·aha. Ia seoka man·gipa chatro chatrirangoni sak 234 san porikkako seangaha aro sak 230-nigitade porikkako sena re·batokjaha.
NEET-UG porikkako seatpilna nanganiara porikkako seaniko nirokenggiparangni ong·gija question paper-rangko on·srete aro mittamrang OMR sheet-rang gin·ako man·anichi porikkako sena somoirang ru·utatako man·e sesrapgijanina sak 1563 chatro chatrirangni matnange aganani ja·mano ong·ataiaha.
Supreme Court-ni ge·etaniko man·e, NTA sak 1563 chatro chatrirangni man·gipa mark-rangko changale gital dake setaipilna cholko on·angaha. Ia porikkani result-ko June 30 tariko parakatna u·iatangaha. NTA-ni ong·atgipa NEET-UG porikkako MBBS, BDS, AYUSH jean a·song gimikni sorkarini aro private institution-rango porainagita cholko on·engipa ong·a.
