Hills State People’s Democratic Party (HSPDP) a∙dokni jatgittam Garo, Khasi aro Jaintia-na maming bak dakgija chu·gimik 80 percent-ko on∙china Expert Committee on the Reservation Policy-na memorandum-ko on∙angaha. Uamangni 80% ko maming bak dakgija a∙dokni jatgittamna nangnikaniara, a∙doko jatgittamni gisepo ma∙ekgrikani dongjanagita miksongani ong∙a ine HSPDP-ni President KP Pangniang aganangaha. Unbaksana January 12, 1972-o dongimin Reservation Policy-ko a∙doko kamna rimnapanio maming neng·nikani gri tom∙tome kamrangko ka∙na man∙agita nipiltaianiko ba dingtangataniko nanga ineba KP Pangniang janapangaha.
Cabinet Minister Rakkam A. Sangma reservation policy-ni bidingo aganengon, a∙dokni manderang sorkarini seokgimin Expert Committee-na an∙tangtangni nangnikaniko ba ku∙pattianirangko da∙o on∙aniko dakenga, iani gisepon an∙ching sengkuna nangao ga∙kenga ine aganangaha. Indake ong∙enggon Supreme Court-ni dongimin niamogita pilak a∙dokrangna 50% reservation-kosan on∙aniko dakronga ine Sangma aganangaha.
Una agreba Meghalaya a∙dokni reservation policy-ko nipilatainiko dakengon name simsakchina aro man∙a dipet ∙dokni reservation policy-ko maming dingtangataniko dakjachina Sangma didiangskaaha.
