West Garo Hills a∙jani Tebronggre songo International Day Against Drug Abuse and Illicit Trafficking-ko gisik ra∙aniko dake pekatgipa bosturangko jakkalgija naljoke dongna man∙agita District Legal Services Authority aro Meghalaya State Legal Services Authority apsan bakrime ong∙atangaha.
Ia tom∙anio Legal Aid Counsel, DLSA, Tura-ni John Cronin Ch. Sangma District Legal Services Authority-ni kamrangni bidingo talatangan baksana a∙jani manderangna aro mongsongbate songsalni kangal cholgrirangna uamangni dakchakna man∙aniko aganangaha.
A∙jani chadamberang pekatgipa bosturangko jakkale aro uno pangchake janggi tangani baditana kingking ong∙engani bidingo (UBI) Tura Sadar Police Station-ni Bitching N. Marak aganangaha. Unbaksana, chadamberangni pekatgipa bosturangko jakkale neng·nikaniko man·enggiparangko u∙igenchimode, uamangko Tura Civil Hospital-ona rimbae namgipa sanna bannaniko ra∙china aro uamangna agan-ku∙pattie on∙a amani bidingoba Marak talate on∙angaha.
