VPP dolni saksa kamkam Shillong-ni MP Ricky Andrew J. Syngkon, Lok Sabha parliament noko da·al salni bako gital Speaker-ko seokna pu·ona tik ka·anio bakko ra·jawa ine aganangaha. Uni bakko ra·jana miksongganiara Speaker-ni biapna susaenggipa NDA aro India Bloc-ni candidate-rangna dolgninan chakgijaniko mesokani ong·a ine aganangaha.
Shillong MP-ni Lok Sabha Speaker-na pu·onanio bakko ra·gijani bidingo mijal salni bako sing·aniko dakon, Ricky NDA aro India Bloc dolgninan chakpagipa ong·jae seokanio bakko ra·jawa aro uamang dolgni melie seokaichina ine VPP-ni President Ardent Miller Basaiawmoit aganangaha.
