West Garo Hills Dadenggre-ni Damal A·sim police thanani ning·o man·gipa Lower Teksragre songo me·chik saksako ka·saninggija uni mama adarangni doka satani video social media-o giproroangani ja·mano dokanio jak donggiparangko police dolrang rim·na ja∙ku de∙angaha ine koborko man∙soaha.
Doka satani ja·pangko sing·sandie nion ia obosta jikma jikseni kosako donnue mikchagrikani a·selo ong·aha ine jolo songdongenggipa manderangni agananio u·ina man·angaha.
Video-o nikanigitade dokanio jako donggiparang sak 4 mang gnang jerangni kosako kakket bichalko on·a pulis dolrang ja·ku de·angaha. Ia a·sel ong·ani bidingo nambate sing·sandianiko dake attamni bako parakatgen ine pulis official-rang u·iataha.
Koborrangko man·soanigitade Tura songjinmani Women Police Station-oni aro Damal Asim thana-oni Teksragre songona re·angaha ine parakataha. Ia ong∙anggipa obostao jak donggipa manderangko pulis dolrang Tura songjinmaona a·selni bidingo sing·sandianiko dakna rimbanasienga ineba u∙isona man∙aha.
