Batanggimin somoirangoni Mendipathar bajar-o a·palchini re·bae bading chiwalenggiparangko, Trading for Non-Tribals (TNT) certificate-rang donga-donggijaniko nirok sandichina Mendipathar Merchant Association dolrangko u·iatani ja·manoba kam ka·janina FIR ka·angaha. Indake ong·engon mijal salni bako TNT-ni bidingo chanchirimnagita ACHIK Northern Zone, Nokma, Lasker, Sordar, Bajar Committee aro Mendipathar jolni NGO dolrang tom·bimonge chanchirimangaha ine ACHIK Northern Zone-ni Co-Chairman Rorok R. Marak parakataha.
Gipin jatrangni ba Non-Tribal-rangni A·chik a·songona napbae niamni a·palo ba TNT certificate gri badingchiwalaniko dakengani a·selo songdongenggipa A·chik jatrang jemaangan TNT certificate gnange bading chiwalenggiparangna neng·nikaniko man·enga ine janapangaha. Una agreba mikkangchi niamni a·palo aro TNT certificate-rang donggija bading chiwalaniko champengnagita kosako janapgimin dolrang ja·ku de·e nirok sandie kamrangko ka·na tik ka·angaha ine ACHIK Northern Zone-ni Co-Chairman Rorok Marak parakataha.
