South Garo Hills a·jao NH 62 (217) ramako aro Baghmara Civil hospital-ko taridapani kamrang ka·sinbeengani gimin adita nangrimgimin NGO dolrang chong·motan GSU Southern Zone, FKJGP, ADE, AHAM, AYWO, NGCO, APA aro gipinrang jinma melie uamangni suk ong·gijaniko Deputy Commissioner-na chitti sedoataha.
NH 62 (217) ramarangni namjabeanichi re·ruraenggipa manderang namen neng·nikbeaniko chagrongenga ine NGO dolrang parakataha. Ramarangko tarina manderangniko a·ani bodol on·a nanggipa tangka paisarangkoba department on·kujaenga ineba janapangaha.
Baghmara Civil hospital-ko tarianiko ru·uta somoirangoni dontongate matchotatgija donenga jekon NGO dolrang ra·chakna man·jae jegalataha. Ian jolni manderangna sanna bannaniko ra·anio neng·nikaniko chagrongenga. Unbaksana, hospital-o nanggipa bosturang jekai pangka, chi, paikana namgiparang dongjani a·selo rongtal an·talaniko rakkina man·jaenga ine NGO dolrang parakataha.
Jolni manderangni chagrongenggipa ia neng·nikanirangko kolgapatnagita NH 62 (217) ramako namdapataniko ta·rakatchina aro hospital-ko namdapataniko matchotate nangchongmotgipa bosturangko ra·bae on·china NGO rang didiataha.
