A∙dok sorkari SSA non-teaching staff-rangni dormaharangko bariatchina dabianiko ra∙chake Finance Department-na pakwatataha aro da·o sorkari a∙dokni tangka paisarangko nigrike kamrangko ka·anggen ine Education Minister Rakkam A. Sangma aganangaha.
Batanggimin somoirango All Meghalaya SSA Non-Teaching Staff Association-rang uamangni dormaharangko bariatchina sal 15 na somoiko tik ka·e donaha aro ia dongimin somoi knalo bon·kamgipa sal ong·enganina, da∙al salo Education Minister Rakkam A. Sangma-ko grongangaha. Uamangni gronganio SSA non-teaching staff-rangni dormaharangko bariatnagita sorkari nanggipa kamrangko ka∙e Finance Department-ona watataha aro uamang sorkarini tangka paisarangko nigrike bariataniko dakanggen ine Sangma aganangaha. Unbaksana sorkari iani bidingo kamrangko ka·engani gisepon jingjengatanirangko dontongatchinaba Sangma mol·molangaha.
A∙doko sak 1200 mangnigita SSA non-teaching staff-rang gnang, uamangni dormahako re∙anggimin 2016 bilsio bon·kame bariataniko dakangaha. Dormaharangko bariatchinagita batanggimin somoirango All Meghalaya SSA Non-Teaching Staff Association-rang, Education department baksa golpogrikanio chu∙sokgipa ong∙na man∙jani a·seloso chotchanggija jingjengatna tik ka∙aona sokangaha ine parakataha.
