WGH a·jani Dalu aro Bangladesh-ni sima ari jolni Chandabui songo da·al pringni 6 bajimangna skang sima ariko wenenggipa sipairangko nirokna ong·katangni somoio BSF-ni Sub Inspector saksako Mongma kal·ake so·otako man·aha.
Sianggipa sipai 100 Bn BSF dolni Rajbir Singh ong·a.Ia a·sel ong·aniara Mongmarang rang·san buring diltuaoni ong·kate chadrape ga·romrome so·otaha ine parakataha. Sianggipa sipaiara Garo Hills-ona Haryana a·dokoniko adita somoirangna watatako man·gipa ong·achim.
Ian gnigipa changna Mongma kal·akanichi BSF sipaini janggiko gimaatani ong·enga jeon skanggipao SGH-oba saksa BSF-ba Mongma kal·akanichi janggiko gimaataha. Ian Mongmarangni cha·ani ringanina brange India aro Bangladesh-ni sima ari jolo rike galani a·selo obostarango chagronge manderangni janggiko gimaataona sokrongenga.
