Mijal salo Tura-ni Council Nokma-rang Reservation Policy ni bidingo Expert Committee-ni Secretary L K Diengdoh-na an∙tangtangni nangnikaniko chittio see janapangaha.
Reservation policy-ni bidingo re·anggipa salrangonin bang∙a dolrangni dilgiparang chanchirimaniko dakengon Council-ni Nokma-rangba ia dongimin reservation jean Garo na 40%, Khasi-Jaintia-na 40% aro gipin backward class-rangna 20% ko maming dingtangatanigri apsan donpilaniko nangnike Expert committee na chitti see u∙iataniko dakangaha.
Meghalaya a∙dok bilsi 50 ong·pilgenchimoba Khasi aro Jaintia jatrang baksa susaanio Garo-rang adita ja∙manchakanirang dongkuenganina 40% reservation-ko donpilaniko nangkuenga ine janapangaha. Ia dongimin reservation-ko komiatgenchimode Garo Hills-ni chadamberang kamgri ong∙e dongna nangaona sokan baksana uamangko brangataona sokatgen ineba Nokmarang janapangaha.
Unbaksana kamona rimnapaniko dakengon reservation quota-o pangchake jerangkon rimnapahachim uamangni bimingrangko name parakaniko dakechina gitaba didiangaha. Apsan dake Shillong-o Ma∙mong Sorkari-ni office-rang jekai Accountant General Office, General Post Office, Telephone Office aro Geological Survey rango Garo-rang kamko ka∙na cholko man·jaenganina quota-ni dongimin biaprangko name nirokaniko dakchina gitaba agandapangaha.
