Lok Sabha session-ni 5 gipa salo NEET porikkani bidingo chanchirimaniko dakchina mikkangchakenggipa dolrang dabiangaha. Pilak nanganirangko golporimna skang NEET-ni bidingo jera ra·aniko dakatchengna nanga ine uamang chadenge chrik a·boke an·tangtangni dabianiko kim·kime sorkario sinjetangaha.
Indake ong·genchimoba, Speaker Om Birla, re·anggipa salo President-ni parliament nok damgni baksa tom·bimonganina mittelpilani kattarangko aganani somoi ong·ahani gimin NEET-ni bidingo jera ra·aniko July 1 tarikni 11:30 bajimangona tik ka·atskaaha.
NEET porikkako re·anggipa jao ong·atangaha jeon Question Paper-rangko sena skangan manderangona ong·gija cholrangko jakkale niamni a·palo sokataha. Iarangko chagronganichi lakh-ni lakh chatro chattrirang namen neng·nikanirangko chagrongangaha aro uamangba NEET porikkako seataina dabianirangko dakangaha. Indake ong·engon sorkari iani bidingo am·sandianiko dakna kang·kare ka·enga ine President Droupadi Murmu aganangskaaha.
