East Garo Hills Dobu-o gitalgipa SBI Branch-ko kulie on·china AHAM dolrang SBI-ni Regional Manager-na Memorandum-ko on·angaha. Dobu-o gitalgipa SBI Branch-ko kulie on·genchimode jolo songdongenggipa manderangna an·tangtangni tangka paisarangko okna reanioba ba Bank-ni nanga kamrangna re·anio altubegipa ong·gen ine AHAM dolrang janapangaha.
Dobu jolo songdongenggipa manderang batrikrikan baksana jolo SBI Branch dongjani a·selo Bank-ni nanga kamrangna re·a doanio namen neng∙nikaniko on·an baksana Williamnagar SBI branch aro Rongjeng SBI Branch-rangona re·na nangao ga·akenga ine AHAM dolrang janapangaha.
Apsandake East Garo Hills a·jao SBI Branch-rang banggijasan dongani a·selo Bank-ni nanga kamrangoba chu·onggijako man·enga aro budepa butchuma, be∙en-ni gita bilgrigiparang-na sorkarini gita on·gipa dingtang dingtang scheme-rangoniko tangka paisa mangnirangko okna re·anioba namen neng∙nikarangko chagrongna nangao ga·akenga. Ia gitalgipa SBI Branch-ko Dobu jolo kulie on·genchimode jolni manderangna namen dakchakbeani ong·gen ineba AHAM dolrang janapangaha.
Unbaksana jolo salantio badingchiwale cha·anio man·gipa tangka paisarangko Bank-rango chimonge don·a gitaba dakchakaniko ra·bagen ine AHAM Dobu Regional Unit-ni General Secretary Windam G Momin aganangaha.
