Re·anggipa June 28 tariko, Nikme D. Sangma ni be·en bimang an·sengjanina aro bilgriani gimin uni deme·chik Bina D. Sangma-ni segipa Namsrang K. Sangma-ko Magupara songni gital A·king Nokma ong·na GHADC-ni Deputy CEM Nikman Ch. Marak baksa Land and revenue-ni staffrang songe on·angaha.
Magupara A·king West Garo Hills a·jani Dalu Civil Sub-Division-ni ning·o ga·akgipa Do·po maharini A·king ong·a aro ian ge∙sa A·chik a·songo dal·batgipa A·king ong∙an baksana dingtangdingtang jatrang maming jajrengagri meli nangrime, tom∙tome songdong a·charam biap damsa ong·a. Maguparao songdonggipa jatrang mongsongbate Hajong, Koch, Dalu, Bihari aro Bengalirang ku∙mong melie songdong a∙chaenga.
Nokma songaniona mongsonggipa sokgiparang GHADC-ni Deputy CEM, Nikman Ch. Marak baksana GHADC-ni Land and Revenue Department ni staff rang, GHADC-ni gitcham EM Jimbirth R. Marak (Goera), gitcham EM (Land and revenue) Holendro R. Marak, Dalu-ni MLA Brening A. Sangma, A∙kingni Headman ba Gaobura, Dalu jolni Nokma Sanirang, Dalu jolni A·gipi songdong a∙chagiparang aro Do·po Maharini chra, depanterang sokbatoke Nokma songanio mikkim gnangataha. Ia tom∙aniko Chra depante Sebastine D. Sangma-ni jakchi dakdilangenba GHADC-ni Deputy CEM Nikman Ch. Marak gitalgipa Nokmako chu∙gimik songe on·angaha.
