Tura songjinmaoni km 35 mang chel·ao donggipa Silchotchigre-ni Sonja Wildlife Rescue Centre (SWRC)-o donenggipa Hurorangko gipin biaprangchi ra·anggija bi·sa ba·chakatgipa centre dakatskana nangnike songni manderang memorandum-ko on·baaha ine saksa songdongenggipa aro Nokmani dal·batgipa chawari koborna parakataha. Sorkari ia centre-oniko mang 6 Hurorangko ra·angna tik ka·angaha jekon Guwahati-ona manggni, Lucknow ona manggni aro Ri-bhoi Umtrew-o gital tarigimin Meghalaya State Zoo-ona manggniko ra·ange donna parakataha.
Ia centre-ko da·o France a·songoni Florian Magne nirokenga aro unbaksa A·chikrang an·tangtangko on·kange bil jakchi dakchakenga. A·dok sorkarioni aro Forest department-oni maming dakchakanikoba man·ja, indiba gisepo saksa sakgnini on·gilanikode man·a ine Nokmani chawari aganangaha.
Uamangni office-ona re·ange a·selko name tale ra·on, ia centre-o manderangni jakoniko naljokate dongipa Hurorangko jasani ja·manon niamnigita buringchi watatpilna nangani niam donga ine u·ina man·aha. Ian sorkarini nikanio Wilflife department-ni dongimin niamko ja·rikgijani aro pe·ani ong·a ine uamang ma·sina man·aha.
Indake ong·genchimoba ia Hurorangko watatpilgija jengjrio chipkete donaha, aro iani a·selo uamang maibakai jengjrioni jokgenchimoba buringchi re·anggija re·bapilaiaha ine parakataha. Songni manderangni talatanigitade Hurorangko gipin biapchina ra·angode uamang janggi tangbangjawa aro meligipa biaprang ong·jae neng·nikbeani ong·gen ine janapataha.
Bebegita sorkari namdapatna sikgenchimode ia rescue centre-ko taridape breeding center, mini zoo ba rescue centre dakangkuanikon nangnika aro ia kamna maming jegalani dongjawa ineba aganangaha.
