Batanggimin 2023 bilsini May 27 tariko South Garo Hills Chokpot Civil Sub-Division-ni ning·o ong·gipa song dambrini dilgiparang nangrime Warimagre songo sak 70 mang manderang tom·e Dareng chibimani na·tokrangko ripingna miksonge a·bachengatangaha. Ia gitalgipa dolrang June 29 2024 tariko changsatai tom·aniko ong·ate adita dilgiparangkoba seokangjolaha. Ia tom·anio song dambrini manderang chanchirime adita niamrangko donangaha chong·motan Dareng chibimani na·tokrangko dingtang dingtang namgijagipa cholrangko ra·e rim·jachina tik ka·angaha.
Warima Fish Sanctuary-ni kosako donggipa wari dam 5 jerangan Kalsinangwari, Warigro wari, Rangtang wari, Wari Dimit wari, Ronggrim warirangoniko aro chisrengoniko na·tok na·tik, etchaluk kolna ba maming chini jontuko rim·na man·jawa ine tik ka·angaha. Ia dongimin niamrangoniko saoba pe·ako rim·a man·ode ua mandeko Committee bichal ka·e sakkiko man·ahaode nikgipana tangka gong hajal 50 aro songbrini nangrimgimin Committee-na gong lakh sa chu·gimik lakh 1 hajal 50 ko sal 15 ni ning·o gamna nanggen ine niamko tik ka·angaha.
Ia songbrini nangrime Committee-ko Dareng River Fish Preservation Committee ine bimungko done President-na Hansting Ch. Marak, Vice-President Pritshon M. Sangma, Secretary Phillipson T. Sangma, Joint Secretary Halbingston Ch. Marak aro gipin gadangni kamrangko jako ra·e ka·nagita dilgiparangko seokangaha. Indake pilakan dongimin niamrangko manipachina ine Dareng River Fish Preservation Committee-nigita u·iatangan baksana mol·molangaha.
