South Garo Hills Baghmara songjinmani ning·o donggipa ramarang nosto ong·e a·kilokrang bang·ani a·selo songdongenggipa manderangna aro salantio office re·ruraanio neng·nikanirangko man·enganina songdongenggipa manderangni palo Southern Zone-ni ACHIK dolrang a·jani Deputy Commissioner-na chittiko sedoataha.
Taridapna nangenggipa ramarangara Baghmara Block office-ona re·gipa, Asim Chiring-oni Dopakrang biapni rama, Capt. Williamson Govt. College-ni ramarang baksana Baghmara PHE office-oni pekwate Bolsalgre-ona re·gipa ramarang ong·a ine chittio janapataha. Ia ramarangko ru·uta somoirangonin taridapgija galchipe donani a·selo ramarang a·kilokraragipa ong·e salantio kamrangchi re·ruraenggiparang aro songdongenggipa manderang ramarang namsrangjani a·selo mongsongbate wachi karini somoirango neng·nikanirangko man·enga jeon ja·achi basee re·namangba namsrangjaha ine u·iatangaha.
Indake songdongenggipa manderangni neng·nikanirangko chagrongenganina sorkarini je scheme-rangkoba ra·bae ramarangko ta·rakkale taridape on·an baksana apalatchinaba Southern Zone ACHIK-ni General Secretary Wilban N. Sangma DC-ko mol·molataha.
