Tura-ni 41 Meghalaya Battalion, NCC Shillong-ni NCC dol baksa bakrime bilsi 17 ni ning·o ong∙gipa me∙chik bi∙sarangna Pre Subroto Cup Football kal∙susaaniko North-East a∙dokrangna Chandmari Football Turf, Tura-o da∙al saloni a∙bachengate on∙angaha. Ia kal∙susaanio North-East a∙dokrangoni dol 8 NCC-ni me·chik bi·sarang bakko ra∙angenga jekon group ge·gni dake sualaha. Group A-o kal∙susanasigipa dolrangara Silchar, Guwahati, Dibrugarh aro Tezpur ong∙a aro Group B-o Kohima, Shillong, Jorhat aro ADG 11 (62 NCC Battalion, Silchar) dolrang ong·skaa. Ia kal∙susaanio chegipa dol North-East a∙dokrangni palo skotong songjinma New Delhi-o Subroto Cup-o kal∙nagita cholko man∙angskagen ine Pre Subroto Cup-ni Co-ordinator parakataha.
Ia kal∙susaaniko da∙aloni a∙bachengate July 9 tarikona kal∙atanggen jeon dolprakan league stage-o changgittamna kal∙e bang·bate point-rangko man∙gipa dolrang final-o kal∙susaanggen.
Da∙al salni skanggipa kal∙anio Shillong aro Kohima kal∙e Shillong 7-0 chi Kohima dolko amataha, gnigipao Mizoram aro Guwahati-ni gisepo kal∙anio Mizoram 4-1 goal-chi Guwahati-ko amataha, gittamgipao Dibrugarh aro Tezpur kal∙anio 1-1 goalko chipe apsangrik ong∙e apsan pointrangko man∙angskaaha.
