Meghalaya Board of School Education (MBOSE) ni porikkao segimin answer script rangko nipilanio adita niamrango dingtanganiko ra·bachina Achik Conscious Holistically Integrated Krima (ACHIK) HQ Tura minggittam ku·patianirangko on·angaha.
Skanggipao uamang re-evaluation-ni fee ba tangka ra·aniko komiatchina mol·molangaha. An·tangtangni answer script-rangko nipiltaiatna damrangko bang·e gamna nanganichi altuae chatro chatrirang ia cholko ra·na man·jaenga aro damrangko komiatgenchimode uamangna dakchakbeani ong·gen ine ACHIK dol janapangaha.
Gnigipa-o re-evaluate-ko ka·giparang sengnang result man·agita ta·rakatchina didiangaha jedakode chubatgipa gadangrango poraina maming neng·nikani gri man·gen. Gittamgipao re-evaluation-ko name dake tiktak ong·e nichina jedakode porikkani lekkarango nichangani aro gualani dongjawa ine uamang didiangaha.
Ia ming gittam ku·patianirangko janapate ACHIK dolrang TURA MBOSE ni Chairman na chitti see pakwatangaha.
