Sonja Wildlife Rescue Centre-ni Hurorangko Ri-Bhoi a·jani Umtrew Meghalaya State Zoo-ona apjitatna maming chanchiani dongkuja ine Chief Minister Conrad Sangma parakataha. Huro rangko apjitatna Central Zoo Authority (CZA) janapgenchimoba sorkarikosa apjitatna tik ka·angaha ine agananiara kakketgipa ong·ja ine Sangma aganangaha.
Hurorangko Garo Hills-oniko ra·ange gipin biapona apjitatjachina mijal salo Tura Garo Senior Citizens’ Forum (TGSCF), New Tura Development Forum (NTDF), Garo Hills Environmental Protection Society (GHEPS) aro Garo Graduates’ Union (GGU) dolrang Sangma-ko mol·molangaha.
Sonja Rescue Centre, CZA ni dongimin aro ra·chakgimin niamrangko ja·rikja ine a·dok sorkarini aganggipa kakket ong·genchimoba ia centre-o maturingrangko bilsi 15 na jilaniko dakoba namdapatna maming ja·kurangko de·angjaha ine adita dolrang janapangaha.
Ia donggimin rescue centre-o matburingrangko jilna neng∙nikgenchimode, Hurorangko Umtrew-ni zoo aro a∙songni gipin biaprangona apjitatana batede Garo Hills-ni ning∙on dingtang biaprangona rimangskaon nambatgen ineba uamang agandape CM-ko mol·molangaha.
