Batanggimin chango, Damal A·sim pulis thanani ning·o ga·akgipa Teksragre songo me·chik saksako uni mama adarangni doke sate sason ka·ani bidingo Tura-ni MDC Bernard Marak adita agantalataniko dakangaha.
Songo noko Lasker-rang dongani gimin pulis-rang re·drakange rim·e ra·ena man·ja ine Marak aganangaha. A·chik a·songna Sixth Schedule-o on·gimin bilrang donga aro iani kosako darang sorkari ba department dakdrana man·ja ine ua u·iatangaha.
Indakgipa a·selrangko sason ka·na Lasker-sa bil man·ani gimin songni nokni dilgiparangko thanaona re·ange rim·a man·gipa manderangko a·kange rim∙e ra·echina Marak ku·pattiangaha. Nokmani A·king ba Lasker-ni ning·o ong·genchimode uamangosa iarangko nirokani bil donga ine Marak agandapangaha.
