Tikrikilla jolo SBI ATM-ko adita salrangna chipe donenganina songdongenggipa manderangni palo jolni NGO-rang jekai AAPE, CEPARD, CSAWO, ASPF aro ACHIK dolrang ATM-ko ta·rake kulie on·pilchina Branch manager-na lekka seataha.
Uamangni agananigitade, Tikrikilla inditan dal·begipa aro mande jelbegipa ong·ani gisepon, jolo SBI ATM ge·sasan gnang jekon adita salrangna chipe donengani a·selo songdongenggipa manderang an·tangtangni tangkarangko bikotnamangba bank-o ru·ute chadenge sengna nange neng·nikaniko man·enga ine parakataha. ATM-ko ta·rake kulipile on·an baksana jolo songdonggipa manderang bang·ani a·selo ATM ge·sa jinmani nanganina chu·onggijaniko janapate ge·gipin ATM-ko ra·bae on·chinagitaba NGO dolrang chittio janapatjolaha.
Uamangni SBI branch manager-na nangnikaniko u·iataniko jolni MLA, Police Station-ni Officer In-charge, BDO aro Naguaparani MDC-naba lekkarangko on·angaha ine bakrimgimin NGO dolrang parakataha.
