Meghalaya Cricket Association (MCA), BCCI ni 2024-25 bilsio senior dolrangna ong·atnasienggipa criket kal·susaanirango bakko ra·na sak 30 kal·giparangni bimungrangko parakataha. Meghalaya dol re·anggipa Plate Group 2023-24 ni kal·suaanio gnigipa biapona sokdoanichi Ranji Trophy 2024-25 ni Elite Group-o kal·na kragipa ong·e seokako man·aha.
Ian Meghalaya a·dokna skanggipa a·songni dal·batgipa gadangni kal·susaanio bakko ra·ani ong·enga jekon October 11 tariko ong·atna man·chie donsoaha. Uni ja·mano joljol T20 Syed Mushtag Ali Trophy-ko November 23 aro One day Vijay Hajare Trophy-ko December 21 tarikoni a·bachengatskagen.
A·chikrangoni seokako man·giparangara Dippu Sangma, Robert Sangma, Arien Bonchang Sangma, Chengkam Sangma aro Lerry Sangma, iamang gipin sak 30 seoka man·giparangoni sak 5 ong·paaha. Gipin seokako man·giparangara Chaman Pushp, Swarajeet Das, Aryan Borah, Bijon Dey, Nishanta Chakraborty, Jaskirat Singh Sachdeva, Adarsh Joshi, Kishan Lyngdoh, Arpit Bhatewara, Bamanbha Shangpliang, Himan C Phukan, Shambhalang Pyngrope, Wallambok Nongkhlaw, Anish Charak, Arbin Singh, Sylvester Mylliempdah, Riboklang Hynniewta, Rohit Shah, Akash Kumar Chaudhary, Ram Gurung, Pankaj Mandal, Roshan Warbah, Ibitlang Thabah, Yogesh Tiwari aro Md Nafees Siddique ong·a.
Iani gisepon pilak kal·giparangko an·tangtangni be·en bimangrangko bilake aro mangkime rakkichina MCA ge·etangaha.
