Ranggira, Soragre aro Sela Ganol-o songdongenggiparang dam-ni chiko wate galani a·selo bang·a neng·nikanirangko chagrongna nangenganina West Garo Hills, CEC H.Q Tura-ni Garo Students’ Union (GSU) dolrang Deputy Commissioner Jagdish Chelani-na chittiko sedoataha.
Mikkarang jimbee waani a·selo dam-ni chirang tang·doaniko, jolo songdongenggipa manderangna MePDCL department-nigita maming mikrakataniko on·chenggija chiko watanichi salantio dingtang dingtang nanganirangna chiko jakkalgiparangna kenbeanirang ong·enga ine GSU dolrang aganangaha. Indake ong∙engon damni chiko watna skang siren-ko wate mikrakataniko on∙chengchina didiangaha.
Unbaksana chiko batsotna submersible dolongko tarie on∙genchimoba chi dal·ani somoio dolongko ripani a·selo poraienggipa chatro chatrirang porikkani somoio sena re∙nagita man·rongja aro Tura songjinmaona nanga kamrangna re∙na dona man·jae neng·nikanirangko chagrongenga ine janapataha.
Jolo songdongenggipa manderang indakgipa obostarangoni naljokna man∙agita, suspension bridge ba paksaoni paksaona kabatgipa dolongko tarie on·china CEC H.Q Tura GSU-ni President Zikku Balgra N. Marak a∙jani DC-o mol·molangaha.
