Assam Tinsukia-ni Dharna basti, Lidu Pahar songo, niamgri koelarangko badinge cha∙gipa mandeni koela a∙damo Meghalaya-ni sakgni koela cho·e cha·giparang namgijagipa gas-ko rang·sitmane koela a·kolo nom·e dongako songdongenggipa manderang nikaha ine parakataha.
Uamangni manggisiko nika bakan Margherita First Referral Unit (FRU)-ona sanna bannaniko dakna ra∙anggenchimoba doctor-rang siaha ine parakataha. Sianggipa manderangara Korhadem songoni Phiniellin Umbah aro Jatah songoni John Nongrum ong·a ine ma·sinagita man·aha. Manggisirangko Margherita Police Station-ni jako pakwatangaha aro iani bidingo rim∙chipe songni manderangko am∙sandianiko dakangkuenga.
Ian gnigipa changna a·selko chagrongani ong·a jeon batanggimin May 24 tariko, Assam aro Arunachal Pradesh-ni sima ario koela a∙damo a∙a rurongdapanichi sakgittam siaha jeon Ri-Bhoi a·jani sakgni koela cho·giparangba janggiko gimaataha.
