South Garo Hills, Baghmara circuit house sambao donggipa bajar-ni ramarang be·wakanichi songdongenggipa aro salantio re·ruraenggipa manderang neng·nikaniko man·enganina, ia neng·nikanirangko naljokatnagita sorkari dingtang ramako ba subway-ko tarie on∙agita tik ka∙angaha. Ia a∙sel obostarang South Garo Hills a∙jao July 2 aro 3 tariko mikkarang dontonggija jimbee waanichi a∙arang be·wake songdongenggipa aro re·ruraenggipa manderangna neng·nikaniko on∙angaha ine Disaster Management Official aganangaha.
Gasupara Block Development Officer-ni agananigitade, Dimapara-oni Ruga-ona re∙gipa PWD rama Meka Adu-o a∙a be·wakani a∙selo champenganiko man∙angaha. Apsandaken Executive Engineer PWD(R) aro Baghmara Sadar Police Station-ni Circle Inspector Cum Officer In Charge-ni agananigitade, Panda aro Dikrong songni rama aro PWD NH rama Baghmara Circuit House samba Bolsalgre-o a∙a be·wakanichi champengatako man∙aha ine parakataha.
Indake ong∙engon Dimapara-Ruga rama, Baghmara-Chokpot PWD rama aro Baghmara-Moheshkola PWD rama a∙a be·wake re·ruraaniko champengatako man∙gipa ramarangko tarie on·manaha ine parakataha. Unbaksana Baghmara circuit house sambani Bolsalgre-o a∙a be·wakgipao rama dingtang ba subway-ko tarie on∙angenga ineba u∙iatangaha.
