West Garo Hills a·jani Ranggira a·brini jolo songdongenggipa dam sku songrang chong·motan Soragre, Pagugre, Dopananggre, Snarugre, Songkongre, Dorenggre, Dalmagre, Wakantagre, Dodinanggre aro gipin songrango wachini somoio Ganol chibimako batsotnagita neng·nikanirangko chagrongenganina, Ganol Ranggol Wari aro Sela Wari-ko Hanging bridge-ko ta·rake kabate on·chinagita Babadam Unit-ni GSMC dol aro Social Activist-rang bakrime a·jani DC-na chitti see didiataha.
Batanggimin salrango Ganol Hydro Power Project Dam-oni chiko maming somoi dongija watanichi chirang dal·ani a·selo chatro chatrirang jadokni aro bilsini porikkarangko senagita re·na man·ja baksana ua jolo songdonggiparang skul, college, office, hospital aro gipin nanga kamrangna re·na donagita neng·nikaniko man·enga ine janapataha. Ua jolni manderangni neng·nikaniko olgrokatnagita janapgimin warirango ta·rake hanging bridge-ko kabate on·chinagita mol·molangaha.
