Da·ororo mikkarang jimbee wa·ani a·selo a·dokni dingtang dingtang biaprango rama jal·langrang, nok jam aro gamjinrang nosto ong·ataniko man·giparangko nirokate namtaipilatani kamrangko ka·na a·jani dilgiparang baksa Chief Secretary D.P Wahlang tom·e chanchirimaniko dakangaha.
Ia tom·aniko dakanganiko ja·mano a·dokni dingtang dingtang a·jarango rusiatako man·giminrangko taripiltainagita tangka gong 13.5 crore-rangko taraken chamatna nanganiko aro nangdapkuna gnang ine Chief Secretary D. P Wahlang parakataha. Rama jal·langrangko taripiltaie namatna aro nanggipa bosturangko sokatna sorkari mikkango done kam ka·angenga ine Wahlang aganangaha.
Ia chanchirimaniona Revenue & Disaster Management-ni Sanjay Goyal, PWD-ni Syed Md. A. Razi, SDMA-oni M. War Nongbri aro a·jani Deputy Commissioner-rangba bakko ra·angtokaha.
