Garo Hills na ru·utbea bilsirangoni dangdike on·anggipa bilsi 92 ong·gipa Bishop George Mamalassery da·al July 5 tarik, 2024 pringni 2:30 bajimango a·gilsakko wate re·angaha. Ua ru·utbea salrangonin ka·sopo chi topani a·sel saknaa man·e Holy Cross hospital-o dongangaha jeon ua rang·sitna neng·nike bilsi 92 o jringjotna janggi galchotaha. Bishop-ko ‘Engineer Bishop’ ineba namen mingsinga.
Bishop George, Kurian aro Elizabeth Mamalassery ni bon·kamgipa depante ong·a jean Kerala Kalathoor-o atchiaha. Bishop-ni ma·gipa uni bilsi 12 ong·engmitingon a·gilsakko watangaha. Bishop, uni seminary-o poraianiko 1950-60 bilsirango matchotaha aro 1960 bilsini April 24 tariko ua kamal songako man·aha. Garo Hills o Assistant Parish Priest-ni kamko bilsi 10 na Tura, Dalu aro Baghmara-o dangdike on·angani ja·mano uko1970 bilsio Dalu ni Parish Priest songangaha. 1979 bilsini February 8 tariko uko Tura-ni skanggipa Bishop dake donataha aro March 18 tariko Don Bosco School kal·chakramo Bishop songangaha.
Uni Bishop ong·e bilsi 28 na Garo Hills-ni kona noksik biaprangona bida on·a, songsalna dakchakna aro sanna bannani a·bao inditan dangdike on·angaha. Bishop Mamalassery, Garo Hills ni ge 57 L.P school, 35 M.E School, 16 Sec. School, 2 H.Sec School, 24 girls’ hostel, 23 boy’s hostel rangna dakchakanioba bak donganga. Salestian Don Bosco rangkoba ua 1988 bilsio Don Bosco College Tura-ko bikotchina okamataha. Iasan ong·aigija a·a chiarangko on·e Jesuits dolrangkoba ua Williamnagar o college kulichina okamataha.
Unbaksana ua Monfort Brothers koba be·en bimangni aro gisiknigita bilgrigiparangna Monfort Centre ko kulichina didiataha. Uni ning·ao nirokanichi Bakdil da·o dal·begipa NGO ong·aha jean Garo Hills ni namgnina kamrangko ka·angenga. Sorkari baksa melie ua skanggipa changna poraianiko dontonggipa me·chikrangna dongchakani gnang KGBV school-ko Jengjalo kulidilaha.
Sanna bannani a·damoba ua kangal cholgrirangna ka·sae songadamrango ge 20 na bate dispensary rangko kuliaha aro mongsongbate 150 palang donggipa Holy Cross hospital-koba a·bachengataha. Ua nurse-rangko tang·doatna uamangko skinagita bang·a dakchakaniko on·angaha aro bu·chuma budeparangna dongchakani nokrangkoba tarie on·angaha.
Da·alo Bishop a·gilsakko wate re·angahaoba uni mingnamgipa kamrangna Garo Hills uko pangnan gisik ra·gen. Ia kamrang Garo Hills-na inditan gamchatbegipa ong·a aro manderang una gro-jin nangna krachongmota.
