A·dokni Power Minister AT Mondal, Aminda Rangsa aro Gambegre-ona re·ange bijoli wataniko namdapatna Nokmarang aro songni nokni dilgiparang baksa tom·e uamangni agananirangko knae ra·angaha. Minister baksa Power Department-ni Commissioner & Secretary, Sanjay Goyal aro MeECL-ni senior official-rangba dongpae bakko ra·angaha.
Tom·anio aganengon, Power Minister songni Nokmarang aro songdongenggipa manderangni agananirangko segate ra·angaha ine parakangaha. Re·baenggipa bilsi 5 o bijoli watanio maming neng·nikani gri manderangona sokatna jotton ka·gen ineba ua aganangaha.
Damalgre-o gital sub-station ko songe on·a a·bachengataha jekon ja 2 ba ja 3-ni gisepo matchotatgen. Indakgipa gital sub-station rangko songe voltage-rangko chu·onge aro gital kolrangko chate namdapatna nangenga ine ua aganangaha. Gambegre-o song damgittam mang bijoli gri ong·e dongenggipa gnang aro sorkari iarangko nirokate nokantiona bijoli sokatgen ine Mondal agandapangaha. Mikka wachi karirango bijoli watanio bang·bata changon neng·nikaniko chagrongenga jekon skanggipa niatchengna nangenga ine Mondal parakangaha.
Ramarang aro chonchongipa dolongrangko MGNREGS nigita tarie on·aba Mondal janapangaha. Unbaksaba, Garo Hills-ni Power Department-ni kamrangko aro scheme-rangko nipilange jolo bijoli wataniko nirokatna officer-rangko ge·etangaha aro mongsongbate mikka balwa rakani ja·mano kam ka·china Mondal aganangaha.
