North Garo Hills, Bajengdoba-gita bolrangko niamgri den·pee Assam a·dokchina badingsrukanirang batroroenganina A·chik Progressive Approach (APA) dolrang gital forest Beat house-ko songchina Chief Minister Conrad Sangma-ko mol·molangaha. Indakgipa kamrang ru·utbea bilsirangonin ong·baenga jean re·anggipa bilsi gittamo namen namjabatroroangaha ine uamang chittio janapataha.
Garo Hills-ni bolrang namgipa ong·ani gimin sepangbatgipa noksul Assam a·dokona badingsruke ra·angronga. Bajengdoba jol Assam a·dok baksa kachapgipa ong·e, bolrangko badingsruke ra·angna altubea aro iarangko niroknagita nangchongmotenga ine APA dol u·iataha. Indake niamgri dakenggipa kamrangko nirikina pilak Bajengdoba aro wilwilao donggipa manderangni palo APA dolrang gital forest Beat House-ko songe on·china Chief Minister-na lekkako pakwatangaha.
