Gambegre Constituency-ni ning·o ong·gipa biaprango bang·a taridapna nanganirangko janapate AHAM Bolori Regional Unit-ni dilgiparang Chief Minister Conrad Sangma-na Memorandum-ko on·angaha.
Uamang, Bolori-o Indoor Stadium-ko ra·bae on·china didiangaha, ian sports-ni a·bao gisiko nanggipa chadamberangna nangchongmotgipa ranta ka·na aro dingtang dingtang kal·susaanirango nambate bakrangko ra·angna man·agita cholko on·ani ong·gen ine Bolori Unit-ni President janapataha. Gambegre-oni Tura songjinmaona re·gipa ramarang namjani a·selo wachi karini somoio neng·nikanirangko man·enganina Doldegre Medical College-gita napake re·gipa ramako tarie on·chinaba janapataha.
Saka Boldamgre-ni State Dispensary-ko PHC-ni gadangona tang·doatchina, Gambegre-o Power Station-ko tarie on·china janapatan baksana college dongjani a·selo poraienggipa chatro chatrirang skulrangko matchotani ja·mano Purakhasia-ona chel·e re·ange porainagita nangenganina gital college-ko Proper Gambegre-o ra·bae on·china didiangaha.
Una agreba Saka Boldamgre-o Eklavya School-ko rikna 2021 bilsio nirokaniko dakange songni Nokma aro WGH-ni Deputy Commissioner baksa ku·chakanggipako da·onaba maming kobor dongkujaenganina ta·rake nirokate rika cho·anirangko a·bachengatchinagita Chief Minister Conrad Sangma-o AHAM Bolori Unit-ni President Sojendro D. Sangma mol·molataha.
