Da∙al salni bako East Garo Hills a∙jani Williamnagar District Auditorium-o tom∙bimonge Garo Hills-ni gital MP Saleng Sangma-ko mande ra∙aniko dakangaha.
Saleng Sangma 2024 bilsini 2-Tura Parliamentary seatna susaanio cheange June jani 25 tariko Member of Parliament ong∙e kam ka∙na ku∙mikchetangaha. Ia tom∙bimongaona Meghalaya Pradesh Congress Committee (MPCC) ni Working President Deborah Marak, gitcham MLA Esmatur Mominin, Brigady Marak aro bang∙a dilgiparangba sokbae bakko ra∙angaha.
Garo Hills-o bilsi 47 na kingking nokdang ge∙sani sason ka∙aniko Congress party ia chango pe∙nagita man∙aha ine Saleng Sangma aganangaha. Iako aganengon Congress party-ni kamrangko da∙osa a∙bachengatenga aro mikkangchi maidakgipa cholrang gnang uarangko nie kamrangko ka∙na nangani bidingoba nipiltae ja∙ku de∙anggen ine Saleng Sangma parakangaha. Unbaksana Parliament-o Northeast-ni bang∙a IAS-rangko nike bilonggen katchabegenchimoba, Garo Hills-oni saksa IAS aro IPS-rangko nikna manpajaha ine aganangan baksana iani bidingo raken kamrangko ka∙na nanganikoba Sangma janapangaha.
Ia chango Parliament-o opposition dolo sak 236 MP donge India a∙songni constitution-ko jokatna man∙aha ineba Saleng Sangma aganangaha. Una agreba re∙anggipa Lok Sabha session-o ku∙rangko on∙a sikgenchimoba somoirang chu∙ongjahani gimin Manipur-ni ong∙enggipa obostani bidingo ma∙mong sorkarina agana chol on∙a man∙agita Manipur-ni MP Angomcha Bimol Akoijam-na somoi on∙a nangao ga∙akaha ine Sangma talatangaha.
