Meghalaya Job Reservation Policy 1972 ko poraia skia man∙anio, songsalni gadango aro sorkario kamna rimnapanio jatni ja∙manchakanio pangchake je dongimin niamrangko dingtangatjachina A∙chik Students’ Welfare Association (ASWA) dolrang Reservation Policy Expert Committee-ni Secretary-na chitti see u∙iataha.
Batanggipa salrango jatni jelanikrisa Reservation-ko bariatna nanga ine dabianirangko niknagita man∙aha. Indake jatni jelanio pangchakesa ka∙genchimode niamni a·palo ong∙an baksana Job Reservation System-ni mongsonggipa nangnikanirangko pe∙ani ong∙a ine ASWA dol janapataha. A∙songni constitution jean Article 16 (4) o on∙gimin niamnigitade Reservation-ko jatni jelaniko nigrikgija ja∙manchakgipa jatrangko apsan ra∙dona aro chu∙ongagita sorkarini kamna rimnapanio nirokna ra·chakgiminsa ong∙a.
2022 bilsio a·dok sorkarini Census ka·gipao mesokanigitade sak 56790 Scheduled Tribe-oni kamna rimnapaniara 61.69 percent-ko Khasi-Jaintia aro 35 percent-ko A∙chik jatna ong∙a jean kamna rimnapanio bang∙en dingtanggrikaniko nikna man∙aha. MBOSE-nigita niatgenchim ong∙ode A∙chik jat poraia skianio namen ja∙manchakenga. A∙chikrangko 2024 bilsini SSLC aro HSSLC porikkarango pass ka∙gipa aro nambata gadango chu∙sokanggiparangko Khasi-Jaintia ni chatro chatrirangming tosusaode A∙chik chatro chatrirang namen komibea aro ja∙manchakuenga ine ASWA dol janapataha.
Khasi-Jaintia aro Garo jatrangna 80% reservation-ko nangdimatchina mittamrangni dabianirangko u·isonagitaba man·aha ine ASWA dolrang aganangaha. Indake dakanichi sorkari kamrango rimnapanio A∙chik jatna namen dal∙a gimaaniko niksamsoe jat gittamna 80% ko nangrimataniko nangnikgijakoba agandapangaha. Iani bidingo Expert Committee-rangko da∙o donggimin reservation policy-ko maming dingtangatgija dake ja∙rikangkuchina ASWA dolrang mol·molangaha.
