A·dok sorkari roster system-ko jakkale sorkarini chalaienggipa skul aro college-rango skigiparangni kamna rimnapaniko dakangna Education Minister Rakkam A. Sangma parakangaha. Da·ororo skigiparangko bang·en nangenga jeon higher education-na ge 800-na baten kamni biaprang dongan baksana ge 400-na bate biaprangko mikkangchi on·dapanirangko dakanggen ine Sangma aganangaha.
A·dok sorkari roster system-ko jakkale kamna rimnapaniko department-rango aro bida pakwatgipa a·damrango State Reservation Policy-o tik ka·gimingita 40 percent-ko A·chikrangna, 40 percent-ko Khasi-Jaintia jatrangna, 5 percent-ko gipin jatrangna aro 15 percent-ko general category-na suale on·ani gnang.
Reservation policy-ko dingtangatchina Meghalaya a·doko songdongenggiparang mongsongbate Khasi-Jaintia jatrang dabiangenga. Iani gisepon Garo jatrangba 1972 bilsio ra·gatgipa ia reservation policy-ko pangna ja·rikbaenggitan dakangkuchina aro dingtangatjachina sinjetaniko on·angenga. Iarangko chagronganichi a·doko bang·a jingjengataniko ra·baan baksana adita kusi ong·gijanikoba nikangna man·aha.
Ru·utgija salrangna skang ACHIK dolrang sal 7 na kingking a·dok sorkariko roster system-ko nipiltaie kam ka·chinagita dabianirangko dakangaha. Roster system-ko public sector organization-rango, department-rango aro bida pakwatchakramrango jakkalna nanganikoba ACHIK dolrang janapangaha. Rakkam Sangma-ni roster system-ko jakkale skigiparangni kamrangna rimnapna miksonganiko parakataniara ACHIK dolrangni dabiani ja·mano ong·angaha.
