Da·al salni bako West Garo Hills a·jani Tura District Auditorium-o tom·bimonganiko ong·ate, Tura parliamentary constituency-na gital seokako man·gipa MP Saleng Sangma-ko mande ra·aniko dakangaha. Ia tom·bimonganiko District Congress Committee aro Tura City Congress Committee apsan bakrime ong·atangaha. Gital MP-ko mande ra·aniko dakani somoio, Meghalaya Pradesh Congress Committee (MPCC) ni State President Vincent Pala aro MPCC-ni Working President aro gitcham MLA Deborah Marak-ba dongpae bakko ra·angaha.
Tom·aniona re·bagipa Tura songjinmani manderangna aganprakengon, Garo Hills-o poraia skiani gadangko tang·doatna nangenga aro iani bidingo rake kamko ka·angna miksongenga ine Saleng Sangma aganangaha. Una agreba Garo Hills-o pekatgipa bosturangko jakkalanirang batroroenganiko champengnagitaba kamrangko ka·na nangani bidingo aganangaha maina ian chadamberangko rusigipa ong·a ine ua agandapangaha.
Apsan daken MP Saleng Sangma-ko knalo Gambegre-o mande ra·aniko dakangskagen ine Ku·rongdik kobor ra·timgiparangna talatangaha.
