Rongrong-ni MDC Rinaldo K. Sangma, a·dokni department-rango kamna rimnapanio reservation roster-ko tik ong·e ja·rikjaenganina, Personnel & Administrative reforms (B) Department-ni Deputy Secretary L K. Diengdoh-na chitti seataha.
A·doko gimik jatrangna dingtang dingtang department-rango apsan ong·e kamrango rimnapna nanganiko High Court tik ka·e reservation roster-ko tarie donani gisepon, ru·utgija somoirangna skang adita kamrangna joljol rimnapanio dongimin niamko ja·rikjaenganiko u·isonagita man·aha ine Sangma janapataha. Meghalaya Public Service Commission (MPSC) kamrango joljol rimnapnagita porikka ra·anirangko dakengon reservation roster-ko ja·rike kamrangna rimnapna ra·chakaniko daknagita daitoko ra·gipa Personnel department-ni kamsa ong·a. Unbaksana a·dok sorkarini ning·o dingtang dingtang department-rango kamrangna rimnapna Commission-ni kam ka·anirangko namedake nirok simsakna aro ra·chaknaba Personnel department-ni jakon ong·a ine Sangma janapataha.
Indake reservation roster-ko ja·rikgija kamrangna rimnapenganiko nanggipa ja·kurangko de·e mikkangchi raken nirok simsakangchina Rongrongni MDC Rinaldo K. Sangma Secretary L K. Diengdoh-ko mol·molataha.
