Assam Nayapara jilani New Life Foundation rehabilitation center-ko, Tura-oni pagipa saksako kragija so·ote siatanina manderangni sinjetaniko man·e Goalpara District Administration bon·kame chipataha. Ia a·selni bidingo nanggipa sing·sandianiko Goalpara police dolrang dakangon kragija doke sate roaniko u·ina man·angaha aro sakkirangko police-rang CCTV o nikna man·aha.
Ua somoio, Goalpara Sadar Police Station ni Debjit Das, Health Officer Dr. Janveer Das aro Dr. Upamay Nath aro Goalpara District Administration-ni Assistant Commissioner, Srisikhamani Barae-ni donganio centre-ko dala kete donataha.
Sianggipa Niksamseng Ch. Marak-ni kosako kragija dakanina uni nokdang, mahari madrang, ripengska aro dingtang dingtang NGO dolrang una kakket bichalko on·china dabianiko dakangaha. Mijal attamni bako Tura Goanang-o sak 200 na bate uni janggina bichake candle light service-ko ong·atangaha.
