SWGH a·jao, World Population Day manianiko aro Stop Diarrhoea Campaign-ko Deputy Commissioner Hema Nayak Dinangpara SSA skul kal·chakramo a·bachengate on·angaha. Ia program-ko a·jani District Health Society dingtang mancha Dinangpara aro wilwilao donggipa songrango bi·sarangni siani bang·ani gimin seoke ong·ataha.
Tom·anio aganengon, Deputy Commissioner Hema Nayak, bilsi watchange bi·sa ba·ani gamchataniko aro sanna bannani a·damrango nokdang rikna tarisamsona dakchakenggipa cholrangni bidingo u·iatangaha. Bi·sarangni gisepo Diarrhoea sabisi man·e sigiparangko ua janapange somoina skang simsaksona nangani gamchataniko aro sanchakramona re·ange name sane ra·china didiangaha. Be·en bimangni bilgriani aro mangrakatgipa cha·ani ringani komianikoba DC janapangaha jeon ua ma·aparangko songtango man·gipa me·su samjakrangko jakkale cha·dilchina aganangaha.
Da·al salo campaign-ko a·bachengatanio tangka paisa nanga gri sabisirangko porikka ra·e niangaha jeon sak 200 na bate manderang namgniko man·angaha. Ia somoio bakgitchakrangni siani aro ma·giparangko simsakani bidingoba tom·e chanchirimaniko dakangaha. Tom·anio bakko ra·gipa VHC-rangba sanna bannanio pilak neng·nikaniko man·enggiparangko talatangaha jekon health department niatna ku·chakangaha.
Ia program-ona a·jani DSEO Tapos Marak, DMCHO aro District Malaria Officer Dr. Lydia Marak, VHC, SHG aro dingtang dingtang department-rang bakko ra·angtokaha.
