India-ni skotong songjinma New Delhi-ni mingsinggipa Dilli Haat-o a·dok sorkarini gnigipa changna ong·atanggipa Meghalaya Pineapple Fest 2024 name matchotangaha.
Ia festival-ona a·dokni Chief Minister Conrad Sangma re·bae Meghalaya Farmers’ Market o nape ge·e game cha·gipa aro entrepreneur-rang baksa agangrikangaha. Ia festival-o, skanggipa saloni salbrigipaona 6.5 ton-mang anarosrangko palna man·angaha. Meghalaya a·dokoni ia gnigipa festival-ona chu·gimik 9-10 ton-mang anarosrangko watataha ine u·iataha.
Chief Minister Conrad Sangma, tom·bagiparangna aganengon, sorkarini gong 5.63 crore-ko rika cho·anina aro gong 1.39 crore-ko kam ka·aniko bariatna, jeon dingtangmancha lakh 78 ko on·chape anaros ge·anio tang·dodapatna 2023 bilsiona kingking jakkalaniko parakangaha. Iarangko dakanichi Lulu Group Abu Dhabi-ona 4.36 MT anarosrangko watatna chu·sokaha ine Sangma aganangaha.
Akdaldalgipa anarosrangko bading chiwale cha·anio dakchakna ge 11 Collective Marketing Centres (CMC) ko ra·baaniko Sangma parakangaha. Dal·dalgipa officer-rangni napbroke kam ka·anirangko champengna aro damrangni tik ong·gijani nirokna ge 338 Integrated Village Cooperative Societies (IVCS) aro ge 28 Organic Farmer Producer Organizations (FPOs) rangko bikote anaros badinganiko nambatatna sorkarini kam ka·anirangko Sangma aganangaha. Sangma, bang·a cholrangko mikkangchi ra·bae on·a aro ge·e game cha·giparangko tang·dodapatna miksonganirangko talatangaha.
Sal 5-na ong·atanggipa ia Meghalaya Pineapple Fest-ona bang·a manderang re·bae an·chingni a·doko ge·gipa anarosrangko cha·e niaha aro MGMP project-nigita doke dame knatogipa ku·rangrangkoba knae ra·angna cholko man·aha. MGMP baksa ku·monganichi jatni daka rika aro bewalrangko, doka damanichi aro git ringanichi ma·sie ra·na man·e ia manianiko an·saodapataha.
