Chang 106 gipa Garo Labour Corps Day-ko, A∙chik pagitcham sakantiko gisik ra∙an baksa mande ra∙ani chinko mesoknagita 1919 bilsionin July 16 tariko A·chik a·songo bilsiantian manirongbaenga. Apsan daken da∙alo ia maniako Lower Babupara, Cenotaph, Tura-o Tura Municipal Board, West Garo Hills-nigita dakdilangaha.
Ia manianiona Additional Deputy Commissioner, West Garo Hills, Tura Dolrich B G Momin, Deputy Superintendent of Police, West Garo Hills, W M Momin, Chairman, Tura Municipal Board, J D Sangma, President Nokma Council, Tura Skylance G Momin, gipin Officialrang, Senior Citizen aro Tura Municipal Board-o kam ka∙giparang sokbatoke bakko ra∙angtokaha.
Ia maniona Additional Deputy Commissioner, West Garo Hills mongsonggipa ong∙e sokbae ia 69th Garo Labour Corps Day ni gamchataniko aro pagitchamrangni France a∙songo skanggipa World War-o dangdike on∙angani bidingo aganangaha.
Ia salko dingtang mancha uamangni dakgrikchakram a∙bao ka∙dongbee dangdike on∙ani aro tom∙tome a∙jatangona sokbaaniko gisik ra∙aniko dakan baksana 69th Garo Labour Corps ni France a∙songo skanggipa First World War-o sianggipa janggirangko gisik ra∙agita manibaenga.
Ia Garo Labour Corps Day-o an∙chingni pagitchamrangni dangdike on∙aniko mande ra∙bee gisik ra∙na Babupara Cenotaph-o sianggipa janggirangna bi∙chakaniko dakange pul bibal rangko donangaha. District Police aro 2nd MLP Battalion, Goeragre-nigita mande ra∙ani chinko dingtang mancha mesokanikoba dakangan baksana sianggipa janggirangko gisik ra∙na minute gnina tom∙tome jrip donganikoba dakangaha.
