Re·anggipa April 30, 2024-o bang·a u·ina nanggipa kamrangni bidingo RTI ka·anina, Meghalaya Mission Organic Director of Horticulture Cliff Colony Shillong-ni Public Information Officer (PIO) ni chu·onggija aro kakket ong·gija aganchakanina RTI Act 2005-ni niamo pangchake raka ja·kuko de·china Joint Director, unbaksana Director-ni gadango ong·gipa PIO-ko WGH Asananggre-o songdonggipa saksa Flaming B. Marak mol·molataha.
Marak, RTI Act, 2005 ni section 6-o pangchake nanggipa lekka pancharang, sakkirang aro sing·anirangko mikkango done department-oni aganchakaniko man·a RTI ka·doangaha. RTI-o sing·anirangna PIO-ni aganchakanirang dilsretgipa aro sing·anigita maming bak nangegijagipa kattarang ong·a ine Marak aganangaha. RTI Act, 2005-ni section 6-o pangchake, RTI ka·anina PIO-rang tale roke aro sing·anigitasa aganchakaniko on·a nanga. Darang PIO-ba RTI ka·anina kakket ong·gijagipa aganchakaniko on·a aro jechakna bil man·ja ine Marak parakataha.
RTI Act, 2005-ni dongimin niamrangko ja·rikgija kam ka·anina aro kakket ong·gijagipa aganchakaniko on·e dilsretanina PIO-ni kosako raka ja·kuko de·china Flaming B. Marak mol·molataha.
