TALATANI
Social Mediao Mothers Union, Turani General Secretary Ma Sume B. Sangmako Ku∙rongdik Channelo uni agangipa kattarangko ma∙sisrete saobarang ku∙attogijagipa kattarangko jakkale una aro chinga ma∙giparangna namen kratchaani aro dukniko ra∙baaha. Unigimin Mothers Union uamangna agan talate on∙aniko dakna ine July-ni 16 tariko meeting ka∙aha.
Uno adita ma∙giparang indake chanchianiko dakaha je chinga Ku∙rongdik Channel gita ia chingni chanchianirangko ba resolutionko parakatgen maina uko jemangan agan-chonnike matnanganiko dakengachim uko ma∙sisrete agananisan ong∙a. Resolution ba chanchianirang indake ong∙a.
1. Mothers Union-ni General Secretaryni miksonganirang aro Union ni kamrangni gimin manderangna talatna nangchongmotaha maina ma∙sisretani a∙sel mikkangchi kam ka∙anirango neng∙nikanirang ong∙naba donga.
2. Chinga ge∙sa Union jekon 1941 bilsio jakgitelna skangan a∙bachengaha aro da∙alona kingking songsalo bang∙a kamrangko chona ba dal∙arangko ku∙cholsan kam ka∙e Unionko rakkie ja∙rikbaenga.
3. Ma Sume B. Sangma, saksa ma∙gipa aro skigipani kamko ka∙gipa ong∙a aro Mothers Union ni kamko bilsi 15 na batpile jako rae ka∙enga. Ua Late Pa Mihir N. Sangma aro Ma Ella Cecilia B. Sangmani chonbatgipa demechik ong∙a. Uni pagipa A∙chik jatni dakbewal rikbewalon uamangko dal∙ataha aro ma∙gipa District Council-on kamko ka∙e janggitangbaaha. Uni pagipa jatna a∙songna ka∙sagipa aro bang∙a ki∙taprangko segipa ong∙achim jekai; MANIANI BIDIK, jekon colegeo poraitoka. Una agreba uni mongsongbatgipa ki∙taprangara, GARO CULTURE 1995 aro THE GAROS 1995. Una agreba uni ki∙tap segiminrang bang∙en donga.
4. Ua saksa A∙chik bi∙sa ong∙e maikai A∙chikni dakbewal aro rikbewal-ko jegalna man∙gen indiba namgijagipa bewalrangko niroke uarangko namdapatna ba namgijakode galsrangna ine miksonganiosa uade aganaha. Uni skanggipa agananirangkode videoko cut ka∙e short clippings ko tarie mitamrang post ka∙aha aro namgipa agananirangko gale jeon una rasong siani ong∙gen ukosa wattoke ong∙gija comment ka∙aha. Kan∙dikbegipa videoko niode namgijakosan ma∙sirikaigen. Ua codification draft ka∙gipako changni chang poraie nimanaha aro uano bang∙en gualanirang donga ine janapaha aro CEM koba mol∙mola gnang niatpachina aganangahachim. (Videoniko nikna man∙a)
5. Mothers Union mamung saloba Garo Customary Lawko jegalja indiba uko namdapatna inesa Sorkari aro uko dilenggipa manderang baksa melie songsalo kam ka∙enga. An∙chingni skanggipa Chief Minister Late Capt. W.A.Sangma pangnan niksamsoe kamko ka∙gipa ong∙a aro Reservation Policykoba 1972 bilsio uni CM ong∙mitingon tariangaha. Bilsi 1990 jolo Capt. W.A.Sangma Nokma, Lasker aro District Councilni officerrangko an∙tangni nokona okamate ia Garo Customary Lawko be∙en pil∙atna aro seachi a∙gilsakna parakna nanganiko nike meeting tom∙ataha, uno Mothers Union ni General Secretary aro Asst. Secretary ua tom∙aniona sakgni re∙angaha. Meetingo mongsongbate ia Garo Customary Law ni bidingo chanchirimna ine Law dept. Shillong baksa donaha. Uano indakgipa dai gamanirang dongachim jekai jakjipana 15 rimbrakana 30 ara jikgalana 60. Meeting chu∙sokjaha maina unsalo A∙chik Me∙chik saksako saoba til∙eke kataha aro uana so∙sojengjeng ong∙aha. Capt. Sangma uno raken nipiltaianiko ka∙na nanga ine aganaha. Iani bidingo Codification of Garo Customary lawko dakna memberrangko appoint ka∙e donaha aro uamangara Dr Milton S. Sangma, Adv. David Ch. Sangma (ukil) aro Mrs Lepmonie ua panelo dongachim aro mitamrang sitokjok uamangsa tariahachim. Uni gisepon District Council uamangni tariako dingtangate watdoataha. Iana object ka∙aniko Committee dakangskaha. Ia Garo Customary Lawko galani ba bon∙ataniko nangja indiba namdapatna ba review ka∙chongmotna nanggen inen skangoni krengdilbaenga. A∙songni ‘Niam Bidik’ ba Constitution of Indiako amend ka∙a ba taridapa jakgitelaoni chang 105 ong∙pilaha maina chasongni kri niam retirang songdonggipa manderang baksa melina nanga.
6. Indake jatna a∙songna kamrangko dangdike on∙anirangko Mothers Union skangonin ka∙baenga. Uni kosako ku∙attogija kattarangna chinga ma∙gipa ong∙e ka∙a be∙a maina me∙chik ong∙e kamrangko ka∙engon basakoba nokdangni gita, songsalni gita bang∙a ja∙dongaanirang donga aro agananirango saniba ma∙sianio ja∙manchakahaode uako namgipa kattarangko jakkale agangrikna man∙a. Social mediao indake ku∙attogija kattarangko agananirang ma∙gipa sakantikon jagokman∙pilataha maina pilakan noktangtango discipline gnang namana dedrangko skia.
An∙ching sakantian A∙chik nokdangonin ong∙e namgipa gun aro cholonrangko ja∙rikna nanga. Me∙chikko saia inteka kattarangko Social mediarango ramram dake ra∙na nangjawa maina iarangnaba a∙songni tarigimin niamo pangchake sastiko ona man∙a. Mikkangchi chubata gadangona name songsarko dakangna rikangna aro nama ja∙kuko ra∙e kam ka∙angpachina sakantikon mol∙molan baksa Mittela.
Mrs. S. K. Sangma,
President
(Sd/-)
Mothers Union, Tura.
