Purakhasia Monupara songo, Jal Jeevan Mission (JJM) project-ko togie kam ka·anina songo songdongenggipa manderang uamangni suk ong·gijaniko parakataha.
Koborna parakatanigitade batanggimin somoio JJM-ni kamrangko matchotaha ine u·iatgenchimoba songni manderangni biapona re·ange nion chi donchakna tank rikgiparangko chelchakna guarerangko cement-chi wall ka·gija silchekchisa tarie donaniko nikna man·angaha. Iasan ong·aigija nokantiona sokatna nanggipa chi pipe-rangkoba rama tongsarangonasan salenba gale donanirangko nikangaha. Chi tank-rangko rike pipe-rangko salgenchimoba pipe ge·antion chi jokkujaenga ine uamang parakataha.
Indake tol·e kam ka·aniara sorkarikosan cha·boka ong·aigija songni manderang pilakkon togiani aro songna nokna namdapaniko ra·baani pal batesa tang·onaniko ra·baskaenga. Ia ong·enggipa obostarangko nipiltaina a·dokni Skotong Minister, gitalgipa MP aro PHE Minister Marcuise Marak kamrangko nirokatna nangchongmota ine didianiko on·angjolaha.
