Chandmari GBHSS football kal·chakramo, Tura Football League 2024-ni 2nd Division aro 1st Division-ni final kal·susaaniko mijal salo ong·atangaha. Ia kal·susaaniko batanggimin jarangonin Tura, District Football Association (DFA) ong·atange matchotatangaha.
Ia final kal·susaaniona Department of Sports and Youth Affairs, Meghalaya-ni Retired Deputy Director aro DFA-ni President gitcham J P. Marak mongsonggipa ong·e sokbaaha. Unbaksana East aro West Garo Hills-ni DFO Rupangkar Marak, DFA-ni General Secretary gitcham Gino Sangma, Baghmara-ni DSO incharge Mongera Marak, Williamnagar District Sports Association-ni General Secretary Rexwell Marak aro Resubelpara Sports Association-ni member Churikcheng Momin ba dongpae bakko ra·angaha.
Skanggipa final-ko 2nd Division-ni kal·angaha. Ia skanggipa final-o Dalu United, Doreng Sporting baksa susagrikangaha. Uandake ia kal·susaani bako Dalu United-ni Nolbirth R. Marak skanggipa half-o goal 1 ko chipe on·angaha aro gnigipa half-o Tangrak Sangma doltangna goal 1 ko chipe on·angaha. Doreng Sporting rasonggribee chu·gimik somoioba goalsakoba chipnagita man·jae sirikaha.
Gnigipa final-ko 1st Division-ni Rongkhon Sporting, Chandmari FC baksa kal·susaangskaaha. Uandake kal·susaani skanggipa half-o Chandmari FC-ni Songanan Shaiza skanggipa goal-ko doltangna chipe on·angaha. Apsan daken Dimsrang Ch. Sangma-ba gnigipa goal-ko Chandmari FC-na chipe on·e ian bon·kamgipa goalba ong·angaha. Rongkhon Sporting kal·susaa a·bachengaoni bon·aona chu·gimiko goal gittamko chipangaha jeon skanggipa aro gittamgipa goal-ko Kevisuzo Chalieu aro gnigipa goal-ko Beny Sangma chipe on·enba doltangko chedilangaha.
DFA-ni ong·atenggipa Tura Football League-ni 1st Division-ni final kal·susaanio cheanggipa dolna tangka Lakh 1, Trophy baksana medal rangko on·angaha. Gnigipa biapko man·anggipana trophy baksa tangka Hajal 70 ko on·angskaaha. Apsan daken 2nd Division-o chegipa dolna tangka Hajal 70 ko aro gnigipana tangka Hajal 50 ko on·angskaaha. Una agreba sakprakna on·gipa trophy-rangkoba 1st Division aro 2nd Division-ni kal·susagiparangna on·angaha jeon 1st Division-o nambate kal·giparangna hajal 3 prakko trophy baksa on·angaha. Unbaksana 2nd Division-o nambate kal·giparangna hajal 2 prakko on·an baksana trophy-rangkoba on·angaha. 1st Division-o Player of the Final-ko Kevisuzo Chalieu, Best Goal Keeper-ko Rakim Arengh, Best Defender-ko Beny Sangma, Best Midfielder-ko Chigam Sangma, Best Forward-ko Andrew Sangma aro Top Scorer-ko Tenggrik Marak man·angaha jean division league-o goal 8 ko chipnagita man·angahachim.
Apsandaken 2nd Division-o Player of the Final-ko Nolbirth Marak, Best Goal Keeper-ko Nengkam Sangma, Best Defender-ko Wanchrang Sangma, Best Midfielder-ko Tangbo Sangma, Best Forward-ko Nikku Marak aro Top Scorer-ni boksisko league-o chu·gimik goal 13 ko chipgipa ong·e Nikku Ch. Marak man·angaha.Kal·susaanio 1st Division-o final-ko kal·gipa dolgni kal·susagiparang mikkang bilsi Super Division-o susanagita sokdoanggiparang ong·angaha. 2nd Division-o final kal·gipa dolrang re·baenggipa bilsio 1st Division-o kal·na cholko man·angskagen.
