Education Minister Rakkam Sangma-ni songsulni skul nok namsrangjani gimin aro tarigija galchipe donenganina songdongenggipa manderang suk ong∙gijaniko parakataha. Ian South Garo Hills a·jani Baghmara Block ni ning·o donggipa Badri Maidugittim song ong·a aro ia skulko ru·uta bilsirangna galchipe donaha ine u·iatangaha.
Songni manderangni u·iatanigitade, ia tarigija galchipe donenggipa skul nokara Education Minister Rakkam Sangma-ni songsulon ong∙achim ine u∙ina man∙aha. Ia skul nok bimang mangmangsan dongaia jeon skul nokni pakmarang, nokkingrang aro asongchakani chokki tablerangba dongjani gimin skul ka∙chakna maming cholan dongsrangjaha ine janapataha.
Sorkarini skanggipao skia-poraianiko mikkango done kam ka∙gen ine agangenchimoba indake skul nokrangni obosta namjaode bi∙sarang maikai skia-poraiani a∙bao tang∙dogen ine janapataha. Sorkarinigita maming nirokani dongjani gimin uamangni suk ong∙gijaniko songni manderang aganangaha.
Unbaksana Rakkam Sangma-ni election-na wenani somoio, ua MLA man∙genchimode ia skul nokkon skanggipa tarie on∙chengna ku∙chakgenchimoba da∙alona kingkingba uni ku∙chakgimin kattako chu∙sokatkuja aro chu∙sokna maming ka∙dongsoaniba dongja ineba Education Minister-ni kosako songni manderang matnangataha.
